Tulay-Tampoy
.jpg)
Nadadaanan niyo ba ang munting tulay malapit at makikita katabi ng lumang munisipyo ng Malolos at Casa Real Shrine, nagsisilbing daan patungo sa Basilika-Minor ng Immaculada Conception na mas kilala bilang "Malolos Cathedral" ? Ito ang tinatawag na Tulay-Tampoy.
Mula at yari lamang sa kahoy at kawayan noong taong 1789, sa paglipas ng panahon ito ay isang naging ganap na tulay na bato na tinibayan noong ika-19 siglo sa pamamagitan ng mga tirang adobe, bato, at semento mula sa Katedral ng Malolos. Dagdag pa rito ang tulay na ito ay nag-uugnay sa malalaking nasasakupan ng Malolos at Barasoain.
Noong taong 1926, ito ay ipinangalan kay Heneral Felipe Estrella isa sa magigiting nating mga bayani at lider na nagmula sa Malolos Bulacan. Namuno sa digmaan sa San Ildefonso laban sa mga Espanyol at namatay noong buwan ng Disyembre taong 1897, inalay ang buhay para sa kalayaan. Dahil sa kanyang kabayanihan at mula noon ito ay tinatawag na "General Felipe Estrella Bridge"
Ang Ilog Tampoy naman ay ang daang tubig na umiiral sa sinaunang pamamaraan ng transportasyon sa Lungsod ng Malolos upang makatungo sa iba't iba pang pamayanan. Naging daungan din ito ng mga inaangkat at iniluluwas na produktong kalakal noong panahon ng mga kastila na nakapag-ambag sa ikagaganda at ikauunlad ng Lungsod ng Malolos.
Ang Ilog at Tulay Tampoy na nagmula sa Malolos Bulacan ang isa sa saksi sa katapangan, katapatan, at dedikasyon ng mga Maloleño. Ito ay nagsisilbing tulay tungo sa hindi malilimutang alaala na malaki ang bahagi sa ating lungsod at ating kasaysayan.
References:
- Landmark / Felipe Estrella https://www.angelfire.com/journal2/philippinehistory/katipuneros1.htm