Paz Reyes Tiongson (Women of Malolos)
Si Paz Reyes Tiongson ay isinilang noong 1862 kina Antonio M. Tiongson at Juliana Reyes. Kanilang tirahan ang malaking lumang bahay-na-bato sa kanto ng Pariancillo Street, ngayon ay M. Crisostomo Street o Kamestisuhan. Kasama ang pamilya ni Paz sa kilusang reporma sa Malolos at sila'y sumusuporta kay Marcelo H. Del Pilar. Noong 1886, binuksan ni Teodoro Sandico, asawa ni Mercedes na kapatid ni Paz, ang isang paaralang pang-elementarya at sekondarya sa Malolos. Nang ipahayag ni Gobernador-Heneral Weyler ang kanyang pagbisita sa Malolos, ginamit ni Teodoro Sandico ang pagkakataon para isulat ang liham na naglalayong opisyal na kilalanin ang paaralan na nagtuturo ng Wikang Español para sa mga kababaihan. Sumuporta si Paz at ang kanyang mga kapatid sa kanilang ama sa pirmahang ito. Ngunit, hindi sumang-ayon si Fray Felipe Garcia, kura ng Malolos, sa panukala. Sa kabila nito, naaprubahan pa rin ang paaralan sa tulong ng mga Kababaihan ng Malolos na naglakbay hanggang Maynila. Sa di-inaasahang pangyayari, namatay si Paz dahil sa sakit sa puso noong 1889. Hindi na niya naabutan ang pag-aaral sa paaralang kanyang ipinaglaban dahil sa kanyang maagang pagpanaw.